Lögregluheimsókn

Á þessum árstíma hefur dyrabjallan venjulega varla stoppað fyrir jólagjafasendingum frá hinum ýmsu fyrirtækjum sem Árni hefur verið í viðskiptum við.

Vínflöskur, flugustangir, flísteppi, konfekt og ostakörfur.

En nú sendir enginn neitt.  Nokkurs konar staðfesting á því að Árni er úr leik.

En í gær var loks dinglað.  Árni spenntist upp og flýtti sér eins og lítið jólabarn að hurðinni.

Þegar hann opnar fyllist húsið af himnesku ljósi. En er við náum loks í lotningu að bera hönd fyrir augu áttum við okkur á að hvorki er kominn heilagur andi né englakór í hans nafni.

Fyrir utan stendur lögreglan í fullum skrúða.

Er ekki nóg að þeir séu búnir að taka fyrirtækið, bílinn og símann?  Þarf líka að taka Árna upp í skuld?

Svona rétt fyrir jólin?

Ég geri mér grein fyrir að æsku barna minna er lokið.  Ekkert barn getur jafnað sig á að sjá föður sinn leiddann burt í járnum á Þorláksmessu.

En í því biður lögreglumaðurinn um Bjarna Björgvin(7).

Veit ekki hvort það var flóðlýsingin frá lögreglubílnum eða sjokkið yfir að Árni væri farinn upp í skuld sem létu mig kalla á Bjarna án þess að spyrja neins.

Hann kemur valhoppandi þessi elska, eins hjartahreinn og hugsast getur.

Og vondi maðurinn, sem var kominn til að rústa fjölskyldunni í laganna nafni, réttir honum pakka og óskar honum til hamingju.

Bjarni hafði unnið verðlaun í jólagetraun lögreglunnar.

Athugasemdir

[Jóna Kolbrún Garðarsdóttir, 24.12.2008 kl. 02:55]

Mamma mín fékk einu sinni sjokk, þegar lögreglan heimsótti hana.  Hún hafði næstum keyrt yfir gangandi vegfaranda og var mjög stressuð út af því.  Þegar lögreglan bankaði uppá hjá henni á þorláksmessu, fékk mamma svona þörf á því að afsaka sig, ég var ekki að reyna að keyra á konuna byrjaði mamma, þá sagði löggan býr hérna Jóna Kolbrún?  Mamma sagði já, ég hafði víst unnið í svipaðri umferðargetraun og löggan var að færa mér vinninginn.  þetta var fyrir svona 40 árum síðan. 

[Sigrún Jónsdóttir (IP-tala skráð) 24.12.2008 kl. 10:33]

Viltu gjöra svo vel að hræða mig ekki svona og það á sjálfan aðfangadag??!!

Ætlaði ekki að klára að lesa pistilinn heldur stökkva uppí bíl og ná í ykkur sem ekki voru hirt uppí löggubíl!! Jahérna hér! Bjarni er vel að verðlaununum kominn!

Stór jólaknús til þín Didda mín og allra þinna frá mér og mínum!

Sigrún

[Katrín Brynja (IP-tala skráð) 26.12.2008 kl. 13:24]

Híhíhíhí

Hér var líka óskað eftir Mána Frey - og honum afhent bókaverðlaun :)

Ógleymanlegt!